From the 28 February to 1 March 2019, Te Aitanga a Hauiti had the pleasure of hosting
Toihoukura - School of Māori Art and Visual Design at Hauiti Marae.
Tomokia tōku whare, ko Ruakapanga e!
He kitenga kanohi he hokinga mahara ki te wā i tūwhera mai ai ngā tatau o Toihoukura Whare Taahu Toi Wānanga ki te ao. I tū tahi rāua ko Te Whatukura hei puna reo, hei pua mātauranga mō te tini tauira i urutomo pia mai. Nakawhiti te haramai i ngā tōpito o te motu whānui. Kei te pērā tonu i ēnei rā.
Pārekareka te noho tahi ki Ruakapanga whare. Ka whakatakoto ko Te Rāwheoro hei tāhūhū kōrero. He maringa nui nō mātau i arahi pai mai te ropū e tō rātau ahorangi i a Derek Lardelli rātau ko ngā kaiako matua ko Steve Gibbs ko Ereena Koopu, ko Henare Brooking ko Ayson Lewis, ko Makarini Solomon.
I te rangi tuatahi ka kawea te wānanga ki runga o Hoturangi ki Ōpoutama. Karanga mai Horouta, karanga mai Takitimu! I rahi mai te tūrama hei kōrero mā Paikea - he tipua, he tahito. Ina te ahikā.
Haruru kau ana te pō i ngā kōrero mō te whare. Otirā ia te whakatutukitanga o ngā kaupapa o Te Rāwheoro. Mārakerake te kite atu, te kite mai i te mahi rangatira a Te Karu Puhipuhi rāua ko tōna hoa rangatira i a Hoana Te Okeroa. Tae atu hoki ki tā Pine rāua ko Hone Taiapa. Whakahaerengia ngā akoranga mā ngā tauira i taua pō tonu.
Rangi tuarua mai ka whaia haere i ngā tapuwae, i ngā takahanga a ngā kaumātua o nehe. Arā te huarahi tūhono i ngā whakaaro me ngā kōrero i whakarerea iho mai hei taonga mā te whatumanawa, hei whakahiko i te wairua kia hua mai ko te tā o te moko.
I te Paraire e rere kau ana ngā kupu pōwaiwai a Tiu rāua ko Haro. Ki a Derek rātau ko Steve ko Ereena. Kei whea mai! Whakamiharo ana. Kei te tipu tonu te whaihanga ki Toihoukura e hika mā e!
All images by Henare Brooking