“Tenei te reo karanga o Te Aitanga-a-Hauiti ki ngā manuhiri kua tau mai nei ki Te Pourewa, ka tū ki runga i te Tāpohutanga o Hoturangi o Titirangi. ”
Te Aitanga a Hauiti
Ko Hauiti te tipuna i noho nei ki Uawa i te tau 1500, a, ko ia te tipuna nui o Te Aitanga-a-Hauiti, i puta whakarunga ki Tūranga, whakararo hoki ki Tokomaru ngā uri, hei karangatanga Hapū ki tēna rohe ki tēna rohe.
Te whakarewatanga o te kaupapa o Te Pourewa ki Hoturangi, 2017. Pikitia nā Krystal Garrett.
Hingangaroa me Iranui
Ko Hauiti te potiki a Hingangaroa raua ko Iranui. Koia nei a Hingangaroa, uri nā Maui, nā Paikea, nā Toi anō hoi, tohunga whakairo i tōna wā. Nānā anō i tū ai te whare wānanga o Te Rāwheoro i Mangakūkū, i tuawhenua atu o Uawa. Ko tōna kaupapa ko te whakapapa, ko nga korero o te iwi, ko te whakairo hoki, otirā ko ngā korero tuku iho mo ngā tipuna pera i a Tangaroa, i a Tāne, i a Ruaumoko mā hei wānanga.
Ko te wahine matua o Hingangaroa ko Tamateataharoa. Kei Uawa tonu ngā uri e noho ana, ara, a Ngati Hauariki me Ngati Kuranui, Ko tana wahineiti ko Iranui, tamahine a Tamatea o Takitimu waka, rāua ko Iwipūpū, tuahine hoki o Kahungunu. Ko ngā tama matamua a Hingangaroa rāua ko Iranui ko Taua tō mua, ka heke ki a Te Whānau-ā-Apanui o te rohe o Te Kaha, Ko Māhaki Ewe Karoro tō muri iho, tipuna o Ngāti Porou o Waiapu.
Ka hau te rongo o Hingangaroa, ka haere ake ngā tohunga o te Tairāwhiti ki a ia Ina ngā kupu o te waiata tangi a Rangiuia, tohunga whakamutunga o Te Rāwheoro;
“Me ko Manutangirua, Ko Hingangaroa,
Ka tū tōna whare Te Rāwheoro , e
Ka tipu te whaihanga e hika, ki Uawa
Ka riro te whakautu, e hika, ki Uawa
Ka riro te whakautu, te Ngaio ki Rarotonga,
Ka riro te Manaia, ka riro te Taowaru;
Ka taka I raro I raro ra, I a Apanui e . . .”
Tokorua ngā wahine a Hauiti. Ko tana wahine matua ko Kahukuraiti, tamahine a Rongowhakaata, tekau ā rāua tamariki. Ka moe anō a ia i a Rākaumanawahē, Tamahine a Uepōhatu, tokorua a raua tamariki. Ka tohua e ia tana tama a Kahukuranui (I a Kahukuraiti) hei ringa kaha mōna, hei arataki i tōna iwi, nā, ka whakanohonoho haere i ana tamariki ki tōna rohe. Nā wai ra ka whai mana a Hauiti me ana tamariki i te rohe o Ūawa, ahakoa ngā raru i waenganui i a rātau, ngā tohe rānei a rāwaho, ka noho tonu hei kaitiaki I uta, hei mana ki tai, moana rā anō, tae noa mai ki te wā i ū mai ai a Kapene Hemi Kuki ki Uawa i te marama o Oketopa i te tau 1769.
uawanui a ruamatua - 1769
E ai ki ngā kōrero a Hauiti mo te wā i a Kuki, kua tangata whenua te iwi, kua kīia ai he whenua kura, he momona. Waihoki he wāhi whai mana a Uawa, mo te tangata, mo te wānanga anō, me te wā kua rangatira hoki i a Hinematioro raua ko Te Whakatatare-o-te-rangi.
Nā, Ko Hinematioro te ūpoko ariki o te whānau o Ūawa i taua wā, a, ko ia hoki tētahi o ngā tipuna mātua o Te Kani-a-Takirau. He ariki tapairu hoki a Hinematioro, he wahine mau i tōna iwi, he wahine whaimana, he wahine whakateitei ki te motu, e ai ki ngā Pākehā tuatahi ki te whenua nei ko te ‘kuini o te Tairawhiti’ te puhi o te iwi I te ūnga mai o Kuki ki kōnei.
Ka heke tahi ngā tohu ariki o Hinematioro raua ko Te Whakatatare o Te Rangi ki to raua mokopuna, ki a Te Kani-a-Takirau, ariki, rangatira o Te Aitanga a Hauiti, a, tae noa ki tōna matenga i te tau 1856.
Ko te Rerenga o Kōpu te kaupapa i wehe ai a Kapene Kuki i tana whenua, ka ū atu ki Tahiti i te tau 1769 ki te whai haere i ngā āhuatanga e pa ana ki ‘Te Ara a Kōpu’, a, mai reira, ki Tūranganui, ki Anaura, ki Uawa hoki.
I te taenga atu ki Ūawa ki te wāhi o Ōpoutama, ka huaina hei whenua ki reira ko ‘Cooks Cove. Ko te kaiarahi o te waka o Kuki ki kōnei, he rangatira he tohunga kaitiro whenua nō Tahiti, Ko tana ingoa ko Tupaea. I eke a Tupaea ki runga i te Kaipuke o Kuki i Matavai. Nō Raiataea a ia.
I heipū “Te Ara o Kōpu” I te tau 2004. I taua tau ka haere wētahi o ngā tamariki o Ūawa ki Ingarangi me Tahiti, ki te whakanui I te take o “Te Ara o Kopu” Hei te marama o Hune i te tau 2012 ko te putanga tuaruatanga mai o “Te Ara o Kōpu”, a, kāore e puta mai anō mo ngā tau 105.
E mea ana a Te Aitanga ā Hauiti, ko te putanga o Kuki ma ki Anaura me Uawa te wā i hou tuatahi ai te rongo i waenganui i te Maori me te Pākehā.
Nō e ūnga o Kuki ki Ōpoutama, ko te rongomau, ko te mataara hoki te āhua o te noho i Ūawa i runga anō i ngā tikanga whakaheke a ngā atua o te rangi me te whenua, taketake mai.
mātaki ‘Te ara tapu o nga tipuna’
